CEBU, Philippines - Gisubhan ang bag-ong building sa Special Weapon and Tactics (SWAT) kagahapong adlawa nga gitambungan nilang Police Regional Office-7 Director Prudencio Bañas ug Cebu City Mayor Michael Rama.
Si Supt. Arnel Banzon, hepe sa SWAT, miingon nga makatabang kaayo sa pag-isa sa morale sa iyang mga tawo ang ilang bag-o ug hamugaway nga building. Sumala pa ni Banzon nga sa karaang building kinahanglan pa nila nga mo-ipli kung mag-uwan tungod kay masudlan sa baha ug magtulo ang ilang atop.
Matud ni Banzon nga nalipay kaayo siya ug ang mga sakop tungod kay kompleto na ang ilang facilities ug naa na sila’y kapahulayan.
Mapasalamaton usab si Banzon sa mga donors nga mitabang aron mobarug ang maong building.
Apan duna pa’y hangyo si Banzon nga madugangan pa ang ilang mga radio equipment, gas masks, armas ug bala tungod kay kinahanglanon kaayo kini nila.
Si Bañas mapasalamaton sa Rotary Club alang sa ilang donasyon.
Matud ni Bañas ang gihimo sa Rotary Club usa ka timaan sa ilang pagsuporta sa kapolisan.
Mipasalamat usab si Bañas sa lokal nga kagamhanan nga misuporta sa katukuran sa SWAT building.
Si Rama sa iyang bahin mipahimangno nga dili siya gusto nga makakita og mga sakop sa SWAT nga daku og tiyan ug matud pa niya nga kinahanglan nga ampingan ang ilang kahimtang sa panglawas.
Matud ni Rama nga dugay na niyang damgo nga dihang pangulo siya sa Police Coordinating and Advisory Council (PCAC) sa pagtukod og modernong buhatan sa kapolisan sa dakbayan.
Aron mabuhatan og katumanan ang maong damgo matud ni Rama nga migahin na ang lokal nga kagamhanan og salapi alang niini sa sunod tuig.
Mipasalig si Rama nga kinahanglan nga well-equipped ang kapolisan samtang naglingkod pa siya sa iyang katungdanan. (BANAT NEWS)