CEBU, Philippines - Gisikop sa mga sakop sa Special Weapon and Tactics (SWAT) ang usa ka lalaki nga gikatahong nagpabuto ug nakuhaan og .38 nga revolver ug usa ka granada sa barangay Pit-os, dakbayan sa Sugbo. Ang nasikop naila nga si Sherwin Velasquez, 40, taga sitio Candarong, Pulangbato, sa maong dakbayan.
Si PO3 Ricky Coca, team leader sa Motorcycle Riding Unit (MRU) North, nga nahinabi sa mga tigbalita miingon nga samtang nagpatrolya sila sa Pit-os nasugatan nila ang usa ka tawo nga nangayo og tabang.
Matud ni Coca nga mitaho ang maong tawo nga dunay usa ka lalaki nga nagpabuto hinungdan nga miresponde sila sa alarma.
Nasigpatan nila ang suspetsado nga nag-bitbit og armas maong ilang giduol ug gisita.
Wala hinuon mosukol ang suspetsado dihang gidakop sumala pa ni Coca.
Dihang girekisa sa kapolisan ang suspek, nakuha gikan kaniya ang usa ka kalibre nga .38 revolver nga may upat ka bala ug duha ka kabhang sulod sa tambor niini. Sa wala pa magpabuto ang suspek giingong nag-away kini ug iyang asawa.
Apan ang asawa nga nahinabi sa mga tigbalita miingon nga napasaylo na niya ang iyang bana ug dili na siya mopasaka og kaso niini.
Nasayran nga bag-o lang nakagawas sa bilanggoan ang suspek tungod sa kasong ilegal nga paghupot og armas. (BANAT NEWS)