CEBU, Philippines - Usa ka gitaktak nga supervisor sa usa ka burgeran ang gipadakop human pasanginling nangawat og P350 mil nga kita sa ilang kompanya diha sa ilang buhatan sa Tumulak Street, Barangay Gun-ob dakbayan sa Lapu-Lapu sa miaging Lunes sa gabii.
Ang gipasanginlang nangawat ug giingong nadakpan dayon didto sa Agusan mao si Erwin Padillon, 31, lumad nga taga Sta. Ana, Agusan del Norte. Siya giingong milarga niadtong Martes sa gabii ug gibinlan pa og dakong kwarta ang iyang kapuyo nga taga Olango Island.
Si Police Senior Inspector Wilbert Parilla, hepe sa Lapu-Lapu City Police Station 3 miingon nga midangop kanila ang tag-iya sa maong establisamento nga si Rolando Laniba, 44, ug misumbong kabahin sa pagpangawat sa ilang kinitaan. Matud pa nga wala silay laing gidudahan kondili si Padillon ra gyud kinsa gitaktak niadtong Biyernes, Septiyembre 5. Wa hinuon ibutyag kung unsay rason sa pagtangtang kaniya sa trabaho.
Nasayran nga giguba na ang tulo ka doorknob sa ilang opisina, gibuak usab ang CCTV camera ug ang CPU sa computer nga konektado niini.
Ang kapuyo ni Padillon nga taga Olango mitug-an nga dunay gibiling dakong kantidad si Padillon kaniya ug kini milarga niadtong Martes padung sa Agusan. Tungod niini daling mitawag si Parilla ni Superintendent Rudy Ilandag sa Surigao City Police Office hinungdan sa pagkaaresto kang Padillon. Gikatakda kining ibiyahe balik sa Sugbo ning mosunod nga mga adlaw alang sa kasong atubangon. (BANAT NEWS)