CEBU, Philippines – Patay ang usa ka lalaki nga nabanggaan og motorsiklo dihang milabang sa karsada pasado alas 10:00 niadtong Sabado sa gabii sa lungsod sa Carmen.
Ang biktima naila nga si Allan Matugas, 39, taga Dawis Norte, Carmen samtang ang nakadasmag mao si John Cris Dimco, 18, taga Cogon East sa mao gihapon nga lungsod.
Sa imbestigasyon sa kapolisan nasayran nga ang biktima gikan ninaug sa iyang gisakyan nga jeep apan kalit milabang sa dalan hinungdan nga nabanggaan sa motorsiklo nga gimaneho ni Dimco.
Ang duha pulos naka-angkon og angol sa ilang lawas ug daling gidala sa Cebu Provincial Hospital sa dakbayan sa Danao luwan sa patrol car sa kapolisan.
Apan ang biktima gideklarar na nga patay dihang nahidangat sa maong tambalanan samtang ang drayber sa motorsiklo gibalhin sa usa ka tambalanan sa dakbayan sa Sugbo. - /GMR) (BANAT NEWS)