CEBU, Philippines – Himoong relocation site sa mga residente sa Manipis ang Lagtang Public Market nga gibiyaan na sa mga manindahay kinsa namalik sa Tabunok, dakbayan sa Talisay.
Ang mga residente kinahanglang ibalhin samtang himoon ang road widening ug benching sa kabukiran sa Manipis nga nakasinati og landslides sa niaging mga adlaw.
Himoon ang benching sa kabukiran aron mas luwas na ang maong lugar gikan sa landslide.
Apan dili makasugod ang kontraktor sa proyekto kon dili mobalhin ang mga residente.
Personal nga giduaw ni Talisay City Mayor Johnny V. de los Reyes ang maong lugar ug gi-awhag ang mga residente nga mosanong sa rekomendasyon sa City Disaster Risk Reduction Management Office nga pagpabalhin kanila.
Ang mga residente wa dayon nisanong sa sugyot sa mayor tungod kay nagduha-duha sila sa pagbalhin kay naa sa lugar ang ilang panginabuhian.
Giandam sa dakbayan ang mga sakyanan sa City Hall aron maoy mohakot sa mga residente nga andam na mobalhin.
Gipasalig ni delos Reyes nga mohatag sila og makaon sa mga residente nga mobalhin.
Ang pag-benching sa kabukiran gisugyot sa Cebu 2nd Engineering District aron dili direktang modahili ang yuta ngadto sa kabalayan.
Ang QM Builders nga maoy kontraktor sa proyekto magsugod na sa benching kon makabalhin na ang tanang pamilya nga maapektohan sa proyekto. Sa pagkakaron padayon pa ang sabot-sabot sa mga residente. - /GMR (BANAT NEWS)