CEBU, Philippines - Negatibo sa sakit nga meningococcemia kadtong usa ka sepulturero sa dakbayan sa Danao nga gikataho nga gi-monitor sa Department of Health nga dunay simtomas sa maong sakit.
Gipahibawo ni Rennan Cimafranca, pangulo sa Regional Epidemiology and Surveillance Unit-7 nga human sa pagsusi sa mga doktor sa Vicente Sotto Memorial Medical Center nasuta nga negatibo kini sa kagaw sa meningococcemia.
Hugot nga gi-monitor ang maong pasyente human gilubong kadtong usa ka lalaki nga taga dakbayan sa Danao nga gikompirmar nga namatay sa maong sakit.
Matud ni Cimafranca nga nagpakita og susamang simtomas ang maong pasyente sama sa hilanat apan nasuta nga normal lang nga hilanat hinungdan nga gipagawas na kini sa tambalanan.
Tungod niini gitambagan ni Cimafranca ang publiko sa hustong pagkaon aron lig-on ang immune system. (BANAT NEWS)