CEBU, Philippines - Patay ang usa ka fruit vendor nga gi-ulo pagpusil diha nga miagi kini atubangan sa Sacred Heart School Ateneo de Cebu sa Barangay Canduman, dakbayan sa Mandaue kaniadtong Miyerkules sa gabii.
Wala pa hiilhi kinsa ang mipatay ni Isidro Abella, 59, minyo nga lumad sa Barangay Can-aga, lungsod sa Sibonga ug kasamtangan nga nagpuyo sa Zone 4, Barangay Canduman. Si PO3 Julius Tradio sa Mandaue City Police Office (MCPO) homicide section, misaysay nga si Abella gikan pa nga namaligya og prutas sa satellite market sa Canduman ug naglakaw kini pauli na unta sa iyang balay.
Pagtungod sa biktima atubangan sa tunghaan dunay tawo nga kalit lang midul-it pagpusil kaniya sa ulo. Matud ni PO3 Tradio nga human sa pagpusil sa biktima ang wala hiilhing lalaki nagdali pagsibat pahilayo sa maong dapit ug walay nakaila kon kinsa ang maong tawo.
Si PO3 Tradio miingon nga ang biktima may samad pinusilan sa iyang ulo nga milapos sa tuo nga bahin sa mata. Sa nahagbaan sa patay’ng lawas nakaplagan ang duha ka kabhang sa kalibre 45 nga pistola nga gituohan nga gikan kadto sa armas sa kriminal. (BANAT NEWS)