CEBU, Philippines – Kritikal ang kahimtang sa usa ka tawo human ang iyang motorsiklo nabangga sa usa ka awto ug naputol dihang nalatayan sa laing sakyanan sa unang Mactan-Mandaue Bridge alas tres sa kaadlawon niadtong Martes.
Ang biktima nailhan nga si Kenneth John Porras, 21, taga Mactan, dakbayan sa Lapu-Lapu kinsa paingon sa dakbayan sa Mandaue ug gikasungag ang kasugat nga Toyota nga awto nga gimaneho ni Noel Patricio nga taga Bulacao, dakbayan sa Sugbo.
Gumikan sa kusog nga impact sa panagsungag, nalagpot si Porras sa pikas habig sa karsada sa taytayan ug naputol ang kaha sa motorsiklo dihang nalatayan sa nagsunod nga Isuzu Sedan nga gimaneho ni Ronald Inso nga taga dakbayan sa Sugbo.
Si PO2 Rosendo Ortilla, field investigator sa Mandaue City Police Office (MCPO) traffic division, miingon nga si Inso wala na makakontrol sa iyang sakyanan ug nasungag kini sa awto ni Patricio hinungdan sa grabe usab nga kadaut.
Si Porras dali nga gidala sa Emergency Rescue Unit Foundation (ERUF) sa Mactan Doctor Hospital.
Samtang unom ka sakyanan ang nagdumbolay sa susamang oras sa kurbadahong bahin sa Poblacion, lungsod sa Sogod.
Si PO2 Dario Dinopol sa Sogod Police Station miingon nga ang Isuzu cargo truck nga gimaneho ni Dionesio Jurcales nga taga Minglanila gikan sa dakbayan sa Sugbo ug naaberiya sa maong lugar.
Ang nagsunod nga Fuso Canter nga gimaneho ni Felix Mananagad nga taga Hiniguran, Negros Oriental kalit usab mipahunong ug ang truckboy dali unta nga mibangil og bato sa ligid apan igo lang giligsan ug miatras hinungdan sa pagkaharos sa lain pa’ng upat ka delivery trucks.
Suwerte kay wala’y naangol sa maong insidente. - /GMR) (BANAT NEWS)