CEBU, Philippines – Di binuhatan sa terorista ang pagpanglabay og granada sa merkado publiko sa lungsod sa Trinidad, Bohol nga miresulta sa kamatayon sa duha ug kapin sa napulo ang naangol. Kini maoy pagklaro sa hepe sa Regional Intelligence Division (RID)-7 nga si Superintendent Pablo Labra II sa pakighinabi sa mga tigbalita kagahapon human nga dunay nanggawas nga mga estoryang binuhatan kini sa mga terorista.
Matud pa ni Labra nga personal ang motibo sa suspetsado nga mihimo sa krimen nga giila nga si Dinoberto Fuentes, 21, nga taga Purok 7, San Vicente, Trinidad, Bohol. Si Fuentes nadakpan na sa kapolisan.
Matud pang Labra nga mas maayong palawman pa ang imbestigasyon aron masubay kung asa gikan nakakuha og granada ang suspek o kinsa ang naghatag kaniya niini tungod kay mga sundalo lang ang makabaton niini tungod kay di man kini mapalit.
Ang namatay sa maong hitabo mao sila si Nestor Bernales ug Fidela Macua. - /EIM) (BANAT NEWS)