CEBU, Philippines - Gipabakwit sa Mines and Geosciences Bureau sa Department of Environment and Natural Resources-7 ang siyam ka pamilya sa Camp 5, Manipis, dakbayan sa Talisay.
Kini human naligid ang mga boulders o dagkung mga bato atol sa pagdahili sa yuta tulo na ka adlaw ang nakalabay.
Matud ni MGB-7 Regional Director Loreto B. Alburo nga "unstable" ug padayon nga modahili ang yuta nga maghatag og peligro sa mga nagpuyo sa maong barangay ilabi na kun magpadayun usab ang pag-uwan-uwan.
Giawhag ni Alburo ang lokal nga kagamhanan sa pagpahigayun sa dinaliang pagpabalhin sa mga apektadong molupyo.
Mismo ang pangulo sa City Disaster Risk Reduction and Management Office, Vince Monterde, mirekomendar sa pagpabalhin sa mga apektadong molupyo tungod sa ka peligro nga matabonan sa modahili nga yuta.
Human sa nahitabong landslide, gihimo dayon ang ocular inspection sa taga MGB-7.
Ang ahensiya niila sa Manipis nga usa sa mga kritikal nga landslide prone area sa dakbayan sa Talisay. (/GMR)(BANAT NEWS)