CEBU, Philippines - Hingusgan sa kagamhanan sa dakbayan sa Mandaue ang kampanya batok sa ilegal nga drugas pinaagi sa pagtukod og balik sa City Anti-Drug Abuse Council (CADAC).
Ang plano nalakip sa pamahayag ni Mayor Jonas Cortes sa iyang State of the City Address (SOCA).
Ang katukuran sa CADAC mao usab ang magbukas sa kahigayunan sa pag-umol sa Barangay Anti-Drug Abuse Council (BADAC) sa kabarangayan.
Dugang ni Cortes nga sa nagpadayong kampanya batok sa ilegal nga drugas sa kapolisan maoy natala ang 85 ka mga nadakpan nga mga pushers ug 87 ang nadakpan sa mga tiggamitan og ilegal nga drugas niining tuiga ug 159 ka tawo na ang napasakaan og kaso.
Sa miaging mga buwan, ang kapolisan sa Mandaue City Police Office (MCPO) nakasakmit og P1.4 milyones nga kantidad nga shabu.
Kini gikan sa upat ka barangay sa Guizo, Mantuyong, Casili ug Subangdaku diin gihimo ang operasyon. (BANAT NEWS)