CEBU, Philippines - Girekomendar ni acting provincial prosecutor Jesus Rodrigo Tagaan ang pagpasaka sa kasong complex crime of multiple murder ug frustrated murder batok sa kanhi opisyales sa Regional Highway Patrol Unit (RHPU)-7 sa korte batok sa pagpatay ni Atty. Noel Archival ug duha ka kauban niini ug miangol kang Paolo Cortes.
Base sa resolusyon ni Tagaan nga dunay igong rason ang pagpasaka sa kaso batok nila Senior Superintendent Romualdo Iglesia, Senior Inspector Joselito Lerion ug PO1 Alex Bacani base sa ebidensya nga gipresentar sa National Bureau of Investigation (NBI)-7.
Apan gibasura ang kaso batok nila ni Chief Inspector Eduardo Mara, impounding area chief ug SPO4 Edwin Galan, in-charge sa impounded nga sakyanan tungod kay walay ebidensya nga mosuporta nga lakip sila sa giingong pagpatay nilang Archival, driver Alejandro Jayme, bodyguard Candido Miñoza ug miangol ni Cortes.
Si Atty. Democrito Barcenas, usa sa abogado sa mga Archival mitug-an sa Banat News nga mo-file sila og partial motion for reconsideration sa resolution ni Tagaan kalabot sa pagtangtang nila ni Mara ug Galan sa maong kaso. (BANAT NEWS)