CEBU, Philippines - Gumikan sa problema sa trabaho ug pamilya nga misangko sa depresyon ang nakita nga hinungdan sa taga homicide section sa paghikog patay sa usa ka lalaki sa Sudlon Riverside, Lahug, dakbayan sa Sugbo niadtong Martes sa gabii.
Ang nagpakamatay naila nga si Neil Iway, 35, lumad nga taga Ibabao, dakbayan sa Mandaue ug temporary nga nagpuyo sa Lahug. Si PO1 John Erick Samosa sa homicide section sa Cebu City Police Office mitug-an nga nag-inom pa og ilimnong makahubog si Iway sa wala pa kini naghikog.
Ang kauban ni Iway sulod sa lawak nga giabangan nga si Jessilou Greño mitug-an nga dihang gikan siya naligo, iya na lang nakita nga nagbitay na si Iway gamit ang liston.
Matud ni Samosa nga bag-o lang natangtang sa trabaho si Iway ug may problema usab sa iyang pamilya.
Samtang usa ka 23-anyos nga estudyante ang misuway paghikog pinaagi sa paglaslas sa iyang ubol-ubol ginamit ang usa ka blade sulod mismo sa Talisay City College (TCC).
Ang biktima giila nga si Argie Bontilao, taga sitio Crusher, Lawaan 3, dakbayan sa Talisay ug usa ka first year college nga mikuha sa kursong Bachelor of Science in Elementary Education.
Matud ni PO1 Ranulfo Villaver nga si Bontilao misuway og hikog tungod kay kanunay'ng makasab-an sa iyang inahan.
Si Imelda Bontilao, inahan ni Argie, miangkon nga iyang nakasab-an ang iyang anak tungod kay nagsige kini og pangayo og kwarta kay aduna'y bayranan sa eskwelahan.
Kagahapong adlawa, matud sa kapolisan, nakasab-an usab og balik ang estudyante sa iyang inahan. Samtang nagklase gahapong adlawa, migawas si Argie ug didto iyang gihimo ang paglaslas sa iyang ubol-ubol luyo sa eskwelahan hinungdan nga nagkagubot kadali ang maong tunghaan.
Luwas na sa makuyaw nga kahimtang si Argie nga anaa sa Talisay City District Hospital. (BANAT NEWS)