CEBU, Philippines - Nagtinguha ang konseho sa dakbayan sa Sugbo nga mabutangan og guwardiya ang mga lugar nga adunay Automated Teller Machines (ATM).
Ipahigayun ang usa ka public hearing sa ordinansahon nga giduso ni Konsehal Noel Wenceslao nga patambungan sa kadagkoan sa Philippine Bankers Association ug kapolisan aron makahatag sa ilang hunahuna.
Tumong sa ordinansahon nga luwas ang publiko sa ilang mga transaksyon sa mga ATM sa dakbayan sa Sugbo.
Matud ni Wenceslao nga daghang Sugbuanon ang naggamit na karon og ATM tungod dali ra ang transaksyon nga makakuha og kwarta aron mag-withdraw o mo-tan-aw lang sa ilang balanse.
Naaghat ang konsehal sa pagduso sa maong balaudnon nunot sa taho kalabot sa kawat, hold-up, pagpangilad, ug uban pa.
Nakita ni Wenceslao nga makatabang og dako sa pagsumpo sa krimen ang presensya sa guwardiya sa mga lugar nga adunay ATM.
Karong Septiyembre 3 gitakda ang public hearing nga girekomendar sa Committee on Laws sa konseho aron masayran ang nagkadaiyang opinyon sa gipang-imbitar. (BANAT NEWS)