CEBU, Philippines- Niabot og 28 ka tawo ang natakbuyan sa sakit nga HIV ug AIDS gikan sa Enero hangtud Hulyo ning tuiga.
Kini ang gibutyag sa pangulo sa AIDS Free Philippines nga si Dr. Rene Josef Bullecer.
Base sa rekord nga niadtong Agosto 4 ang labing ulahing nataptan og sakit nga AIDS mao ang usa ka call center agent.
Matud pa ni Bullecer atol sa ika-20 ka tuig nga anibersaryo sa AIDS Free Philippines nga nagsaka ang gidaghanon sa mga tawo nga natakbuyan sa maong sakit.
Iyang gipahibawo nga sukad niadtong tuig 1995 hangtud karon nitala na sila og 1,354 ka mga kaso sa HIV ug AIDS diin 760 ang nataptan sa HIV ug 392 usab sa AIDS ug 360 niini ang namatay na. Niabot usab og 897 ang nataptan sa maong sakit ang mga lalaki samtang 485 ang mga babaye nga nagpangedaron og 15 ngadto sa 59 anyos.
Si Bullecer miingon nga nakapasamot sa maong sakit mao ang sayop nga kampanya sa gobiyerno nga mogamit og mga contraceptives sama sa condom aron makalikay sa sakit nga HIV ug AIDS. - /GMR) (BANAT NEWS)