CEBU, Philippines- Nailad sa buntis nga babaye nga nagsakay og awto ang sales attendant sa Cherry Mobile Store sa A. del Rosario, Guizo, Dakbayan sa Mandaue human nibayad og P18 mil nga fake money sa duha ka cellphones alas 5 pasado sa hapon niadtong Lunes.
Si PO2 David Omambac sa kapolisan sa Presinto 1 sa Mandaue City Police Office (MCPO) miila sa biktima nga si Rinalyn Alinsug, 24-anyos, taga M.J. Cuenco Avenue, dakbayan sa Sugbo.
Asoy sa biktima nga nagpatuo ang maong buntis nga babaye nga 5’2” ang gitas-on ug kasarangan ang panagway ug panglawas nga mopalit og cellphone.
Maoy gipangita sa babaye ang Omega HB nga cellphone apan matud pa sa biktima nga wala sila sa maong matang hinungdan nga iyang gisugyot ang ultra white kay maoy anaa kanila.
Dugang pa ni Omambac nga gitan-aw sa maong babaye ang duha ka matang sa cellphone ug pagkahuman nananghid kini sa biktima nga mobalik na lang kay magkuha pa kini og kuwarta.
Sa pagbalik sa babaye sa tindahan nagsakay na kini sa color dirty white nga awto nga gimaneho sa usa ka lalaki.
Gitug-an ni Alinsug nga igo na lang nga nanawag ang babaye sulod sa awto nga ihatag kaniya ang duha ka cellphones nga napilian.
Si Omambac miingon nga gihatag sa biktima ang duha ka cellphones ug gitunol usab sa babaye ang bayad nga P18 mil nga pulos tibuok P1,000 dayon bulhot padagan sa sakyanan.
Namatikdan na lang sa biktima nga fake ang gibayad nga kuwarta hinungdan nga midangop sa kapolisan.
Si Omambac miingon nga ang plate number sa sakyanan nga YKK 779 ang natiman-an sa biktima nga ilang susihon sa Land Transportation Office aron mailhan ang tag-iya niini. - /GMR) (BANAT NEWS)