CEBU, Philippines- Gipasakaan na og kaso ang duha ka lalaki nga nasikop sa Philippine Drugs Enforcement Agency-7 nga nakuhaan og ilegal nga drugas nga gitawag og “fly high” sa may JY Square, Lahug, dakbayan sa Sugbo.
Ang gipasakaan na og kiha mao sila si Jose Rafael Dizon ug Richard Tan kinsa nakuhaan og 56 ka kapsula sa “fly high” ug 11 ka kapsula sa shabu nga kantidad og P100,500.
Si PDEA-7 Director Jeffrey Bangsa miingon nga posibleng nakasulod na sa Sugbo ang maong matang sa drugas ug target niining baligyaan ang dakbayan gumikan kay daghan ang makakaya sa pagpalit bisan mahal ang presyo.
Usa sa gisubay karon sa mga ahente sa PDEA-7 ang mga mahalong night clubs nga posibleng target sa mga nagbaligya sa drugas.
Nasayran sa maong buhatan nga ang namaligya ra usab ang naghimo sa maong drugas pinaagi lang sa pagsagol sa ecstasy, shabu ug usa ka vitamins aron pormahon ang “fly high” nga drugas.
Gipasabot ni Bangsa nga posible usab ang estudyante nga adunay kaya ang mopalit sa maong drugas. - /GMR) (BANAT NEWS)