CEBU, Philippines- Nakauli na sa ilang probinsiya kadtong 16-anyos nga dalagita nga nakontrobersiyal human giingong nangawat og senina sulod sa boutique sa usa ka mall sa siyudad sa Mandaue.
Kini human nakabayad ug natan-aw ni Dr. Rene Obra sa Center for Behavioral Sciences sa Vicente Sotto Memorial Medical Center.
Niadtong Biyernes sa hapon nakagawas ang dalagita gikan sa pag-atiman sa Mandaue City Social Welfare Service human nagkasinabot ang amahan sa bata ug ang tag-iya sa boutique.
Nagbilin og suwat ang dalagita nga nangayo og pasaylo sa tanang tawo nga nahasol sa iyang gihimo ilabi na sa tag-iya sa boutique.
Matud niya nga wala siya’y angayang ipasabot sa mga tawo kon unsa man ang ilang pagtuo ngadto kaniya ug siya nanghinaut nga mahunong na ang pagsaway kaniya ilabi na sa social networking site.
Si Mandaue City Social Welfare Officer Violeta Cavada miingon nga bisan og nakabiya na sa Sugbo ang menor de edad padayon silang nakig-alayon sa DSWD sa probinsiya sa Leyte aron pagmonitor sa sitwasyon sa dalagita. - /GMR) (BANAT NEWS)