CEBU, Philippines- Miabot na og 27 ka tawo ang naghikog sa Sugbo sulod sa buwan sa Enero hangtud Agosto 18 niining tuiga. Kini nagpasabot nga tulo hangtud upat ka tawo ang naghikog matag buwan base sa record sa homicide section sa Cebu City Police Office (CCPO).
Usa ka Junreil Jacaban, 23, nga taga Lamacan, Babag I, dakbayan sa Sugbo ang nakit-an nga wala na’y kinabuhi kagahapon sa buntag human naghikog ug mao’y ika-27. Sa imbestigasyon sa kapolisan nasayran nga gumikan sa gibating nervous breakdown ang hinungdan nga nagpakamatay gamit ang electrical wire nga gihigot sa iyang liog.
Kasagaran sa mga nagpakamatay mga lalaki diin ang buwan sa Mayo maoy duna’y labing daghang naghikog nga miabot sa 5 ka tawo.
Sa kinatibuk-an, 21 ang lalaki ug unom ang babaye nga natala nga nagpakamatay sukad niadtong Enero. Duna’y upat ka tawo ang misuway unta og hikog apan nabantayan sa ilang pamilya.
Sagad sa mga naghikog nigamit og pisi, pusil ug pag-inom og insecticides ug may milayat sa building. Edad 20 hangtud 40 ang kasagaran sa nagpakamatay.
Matud ni SPO4 Alex Dacua, imbestigador sa homicide section sa CCPO, nga daku og natampo ang problema sa drugas sa mga tawo nga naghikog ingon man ang depression gumikan sa problema sa kuwarta, balatian ug gugma. - /GMR) (BANAT NEWS)