CEBU, Philippines- Suspek sa pagpusil patay sa usa ka babaye pipila ka adlaw na ang milabay, gipusil usab ug namatay sulod sa iyang balay diha sa Sitio Batuan, Barangay Sudlon II, Cebu City, niadtong adlaw nga Sabado.
Ang biktima naila nga si Erwin Alicaba, 35, nagpuyo sa maong dapit.
Sa inisyal nga imbestigasyon sa Homicide Section sa Cebu City Police Office nasayran nga samtang nagpahulay si Alicaba sulod sa ilang balay, usa ka wala mailhing tawo ang kalit misulod ug mipusil sa biktima.
Matud pa nga nakahigayon pa og dagan si Alicaba, apan gigukod gihapon kini sa gunman ug gitiwasan sa pagpusil sa nagkadaiyang parte sa iyang lawas, hinungdan sa kamatayon niini.
Si SPO4 Alex Dacua ang imbestigador sa maong kaso mitug-an sa Banat News nga si Alicaba mao ang gitudlo nga suspek sa pagpatay ni Ellen Ybañez, 24, nga silingan ra ‘sab ni Alicaba.
Mikompisal ‘sab matud pa ang biktima ngadto sa ilang amahan ug miangkon nga siya ang mipatay sa maong babaye. Sumala pa ni Dacua nga nahimo ni Alicaba ang pagpatay ni Ybañez human nga kini ang pirmeng hinungdan sa away nila sa iyang asawa kay selosan niini ang babaye.
Gidugang pa ni Dacua nga ila pa unta nga giadto ang nahitabo-an sa pagpamusil apan, ang amahan ni Alicaba nga si Junnie ang mipasabot sab sa kapulisan nga dili na niya ipa-autopsy ang lawas sa iyang anak ug gani gilubong dayon kini pagkahapon dayon.
Ang kapulisan nagtoo nga posibleng gibawsan lang si Alicaba sa pamilya sa iyang napatay, apan wala ’sab gipadaplin sa kapulisan ang posibilidad nga duna’y lain nga kontra ang biktima.
Samtang usa ka Isidro Bacalla, 45, kinsa naglingkod sa parking area sa traysikad diha sa Plaridel Street sa Barangay Ermita, Cebu City ang gipusil patay sa wala mailhing tawo.
Ang biktima naigo sa iyang nawong gamit ang usa ka .9mm nga armas base sa nakuha nga usa ka basiyo sa bala. Blangko pa ang kapulisan sa motibo og sa mihimo sa krimen. - /EIM) (BANAT NEWS)