CEBU, Philippines- Nagkawilkawil na lang ang liog sa usa ka guwardiya nga gituohang gibunalan og tubo ang ulo una pa kini gigulgol sa kanhi trabahante sa gibantayan niining compound diha sa Tabok, Mandaue City.
Ang biktima mao si Melchor Pasinable, taga Barili ug guwardiya nga nadestino sa Vineyard Construction sa maong barangay.
Samtang usa ka Antonio Chequito, 23, taga Siaton, Negros Oriental apan nagpuyo karon sa Barangay Apas, Cebu City nga kanhi trabahante sa nahisgotang construction firm ang gidakop human giingong maoy uwahing nakit-ang misulod sa maong compound sa wa pa madiskubrehi ang lawas ni Pasinable.
Si PO2 Gerald Magpantay sa Presinto 3 sa Mandaue City Police Office (MCPO) nga nahinabi sa Banat News miingon nga nadiskubrehan sa kaubang guwardiya nga nadestino sa gate si Pasinable nga nagbuy-od diha sa sulod sa compound ug naligo sa kaugalingon niining dugo.
Sa pagsusi sa mga imbestigador pinangulohan ni SPO1 Edmund Belacora, usa ka tubo nga puthaw ang ilang nakit-an sa crime scene nga gituohang maoy gigamit pagbunal sa ulo sa biktima tungod kay nadugmok man ang bagulbagol niini.
Gidudahan nga ang pagbunal kaniya maoy nakapalup-og niini sa yuta ug diha na kini gitiwasan pinaagi sa paggulgol sa iyang liog. Gituohan karon sa mga awtoridad nga gidala sa killer ang shotgun sa biktima.
Sa gihimong pakisusi nila ni Belacora ngadto sa kapolisan sa Siaton, Negros Oriental, ilang nasuta nga ang suspetsado nga si Chequito may kaso kini nga pagpatay sa ilang dapit apan wala mapriso tungod kay ang mga kabanay sa iyang gipatay wala mopasaka og kaso.
Usa ka guwardiya nga kauban ni Pasinable ang mibutyag nga iyang nakit-an si Chequito diha sa ilang gibantayang construction firm alas- 11 pasado sa gabii niadtong Sabado.
Ang suspek kinsa gitanggong karon sa kapolisan kusganong mihimakak sa pasangil tungod kay matud niya suod sila nga managhigala sa biktima.
Iyaha usab giklaro nga boluntaryo ang iyang pag-resign sa maong kompanya. - /EIM) (BANAT NEWS)