CEBU, Philippines- Kapin sa 500 ka lumolupyo sa dakbayan sa Mandaue nga wala’y trabaho ang mihugop sa job fair nga gihimo niadtong miaging Domingo isip kabahin sa mga kalihokan sa 45th Charter Day nga kasaulogan karong Agosto 30, 2014.
Si Mussolini Suliva nga maoy pangulo sa Public Employment Service Office (PESO) sa dakbayan miingon nga ang 29 ka mga establisamento sa dakbayan ang misalmot alang sa local hiring ug lima usab ka recruitment agencies ang misalmot alang sa trabaho ngadto sa gawas sa nasud.
Dugang pa ni Suliva nga sa 500 kapin ka mga aplikante nga naggikan sa nagkadaiyang barangay, 110 kanila ang gidawat dayon.
Gitataw ni Suliva samtang 110 ang nakasulod gilayon og trabaho human sa interbyu , duna say gidawat apan kinahanglang mosumitir pa sila og dugang rekisitos.
Si Suliva miingon nga may mga nadawat usab nga aplikante alang sa trabaho sa gawas sa nasud. - /EIM) (BANAT NEWS)