CEBU, Philippines- Boluntaryong mipahawa ang mga illegal settlers gikan sa ilang gipuy-an sa barangay Santo Niño, dakbayan sa Sugbo.
Ang Santo Niño Residents Association (SNRA) sa milabay’ng buwan mipadala og suwat nga naghangyo sa Prevention, Restoration, Order, Beautification, Enhancement (PROBE) nga ilangan lang una ang demolisyon samtang nakig-alayon pa sila sa Division for the Welfare of the Urban Poor (DWUP).
Niadtong milabay’ng buwan usab ang PROBE mipadala og suwat sa mga residente sa pagpapahawa na sa lugar.
Si Raquel Bohol Arce, hepe sa PROBE, mibutyag nga niadtong Lunes, 53 ka pamilya ang boluntaryong mihawa sa lugar ug miokupar na sa relocation site nga gihatag kanila sa La Guerta sa barangay Lahug.
Matud ni Arce nga hawan na ang luna sa Quezon Boulevard nga gi-okupar kaniadto sa mga illegal settlers.
Dugang ni Arce nga ang iyang buhatan maoy mihatag og sakyanan sa nahisgutang mga residente nga ilang gisakyan sa pagbalhin paingon ngadto sa relocation site. - /GMR) (BANAT NEWS)