CEBU, Philippines- Nakompirmar sa laboratory test nga “fly high” nga klase nga drugas ang nasakmit sa Philippine Drugs Enforcement Agency (PDEA 7) gikan sa duha ka mga lalaki nga ilang nasikop sa sulod sa usa ka food chain sa may JY Square, Lahug, Cebu City, niadtong Biyernes.
Si Dave Mark Maramba, ang hepe sa Planning and Operations Division sa PDEA miingon human sa confirmatory test nga gihimo sa PDEA laboratory.
Sumala pa ni Maramba 56 ka mga kapsula nga fly high ang ilang nasakmit gikan nila ni Jose Rafael Dizon ug Richard Tan, human nga gikontak sa mga operatiba aron sulayan kung makahatag ba sa maong matang sa drugas.
Ang matag kapsula sa “fly high” gikatahong tag P1,500 ang buok niini.
Ang “fly high” ang usa kini ka bag-ong matang sa drugas, diin gisagol ang shabu ug usa ka sex performance enhancement pill sulod sa usa ka kapsula.
Gi-monitor karon sa maong buhatan ang mga sikat, iladong night club dinhi sa dakbayan nga giingong dunay gipamaligya sa maong matang sa drugas.
Wala pa ‘sab gibutyag sa PDEA 7 kung asa gikan ang mga drugas nga nakuha gikan sa duha.
Gitanggong na sa PDEA 7 detention cell ang duha ka mga dinakpan nga gikatakdang pasakaan og tukmang kaso karong buntag. - /EIM) (BANAT NEWS)