CEBU, Philippines - Katunga sa mga magpa-hygiene sa City Health Office sa dakbayan sa Mandaue matag buwan ang positibo sa bacterial infection.
Si Retchie Rizon sa record section sa social hygiene department sa CHO miila sa mga establesamento nga ang mga kawani gipaubos sa senemanang hygiene sama sa KTV bar, massage parlor ug uban pa.
Niini lang buwana, sa 513 nga mga babaye nga nagpa-hygiene nasuta nga 263 ang adunay simtoma sa bacterial infection.
Matud ni Rizon nga dili kini makapaalarma sanglit matambalan pa sa doktor ang maong infection. Sa iyang bahin si Dr. Edna Seno, city health officer sa Mandaue, miingon nga padayon ang ilang paghingusog sa kampanya sa paglikay sa maong matang sa sakit.
Nunot sa maong kampanya, natukod usab ang HIV/STD Drop-In-Center ug Social Hygiene Center nga gisubhan kagahapon nga gitambongan sa kadagkoan sa World Bank ug mga opisyal sa kagamhanan sa dakbayan.
Ang pagpaubos sa matag semana nga hygiene sa mga babaye nga nagtrabaho sa mga balay-kalingawan mao usab ang nag-unang gikinahanglan sa kagamhanan sa dakbayan sa Mandaue sa paghatag og kasegurohan alang sa pagpadayon sa ilang operasyon. (BANAT NEWS)