CEBU, Philippines - Ang kagamhanan sa dakbayan sa Talisay nagtinguha sa pagbalhin sa Manipis Elementary School paglikay sa disgrasya sa mga estudyante ug magtutudlo.Niining ulahi lang usa ka classroom sa maong tunghaan naligiran og mga dagkung bato ug maayo na lang gani walay mga nadisgrasya nga mga tinun-an ug magtutudlo.
Ang Mines and Geo-Sciences Bureau (MGB) sa Department of Environment and Natural Resources (DENR) mideklara nga risgo kaayo ang nahimutangan sa eskwelahan ilabi na kun dunay linog ug pagbunok sa uwan.
Ang Manipis usa sa bukirang barangay sa Talisay ug ang nahisgutang eskwelahan nahimutang kini sa ibabaw nga bahin.
Si Mayor Johnny De los Reyes mimando kang City School Division Superintendent Woodrow Denuyo nga ipabalhin ngadto sa laing lugar ang eskwelahan.
Ang kapitan sa nahisgutang barangay nga si Emma Cabiluna gitahasan kini ni Denuyo sa pagpangita og labing luwas nga lugar nga mabalhinan sa eskwelahan.
Ang kagamhanan sa siyudad magpadala sa city engineers ngadto sa Manipis aron pagsusi sa kadaot nga namugna sa mga batong naligid ngadto sa classrooms.
Samtang nangita pa og kabalhinan, si De los Reyes mimando sa city engineers sa pagbutang og lig-on nga koral sa classroom nga makapugong kung dunay laing pagdahili sa yuta nga mahitabo. (BANAT NEWS)