CEBU, Philippines - Gigahinan sa Kapitolyo og tag P2 milyones ang pagpaayo sa mga karaang simbahan sa lungsod sa Sibonga, Dalaguete ug Samboan.
Ang tag P2 milyones nga hinabang pinansiyal sa Kapitolyo ipaagi ngadto sa mga lider sa simbahan. Matud ni Bise Gob. Agnes Magpale nga magbuhat og Memorandum of Agreement ang Kapitolyo ug simbahan lakip na ang mga arkitekto nga motrabaho sa pagpabalik sa karaang dagway sa simbahan nga nadaut sa linog.
Gipaabot pa ang resulta sa pakisusi sa kahimtang sa mga simbahan sa dili pa itunol ang hinabang pinansiyal.
Laing nakit-an ni Magpale nga problema mao ang pagbalhin sa mga pari nga nitabang sa plano ngadto sa laing simbahan.
Gisanglitanan ang pagbalhin kang Fr. Mario Mejia gikan sa parokya sa Samboan ngadto na sa Badian. (/GMR)(BANAT NEWS)