CEBU, Philippines- Mga ilegal nga billboards sa dakbayan sa Sugbo buot nga ipatangtang tungod kay kadaghanan kanila walay mga permits.
Usa ka memorandum ang gipagawas ni acting mayor Edgardo Labella ang gipadangat niini kang Konsehal Philip Zafra, presidente sa Association of Barangay Councils ug kang Atty. Jose Marie Poblete pangulo sa Office of the Building Official (OBO) nga susihon ang mga nagkatag nga billboards sa dakbayan. Sumala pa nga nakadawat si Labella og mga reklamo nga uban niini walay mga permit. Matud ni Labella nga kinahanglan molihok ang mga barangay tungod kay ang mga billboards usa sa mga gikuhaan og income sa mga barangay.
Gidugang ni Labella nga ubos sa Local Government Code, Section 152, aduna’y katungod ang mga barangay nga mangayo og buhis sa mga billboards nga gibutang sa ilang mga barangay.
Matud sa report sa OBO aduna’y 19 ka billboards ang gitukod sa lain-laing lugar sa dakbayan. Ang masakpan nga kompanya nga nagtukod og billboard nga walay saktong permit gikan sa OBO mahimong makamulta og di momenos P5 mil ug pagkompiskar sa billboard materials. - /EIM) (BANAT NEWS)