CEBU, Philippines- Lalaki nga miapas sa iyang asawa nga nakig-inom kauban sa iyang mga silingan ang gidunggab human iyang gibuak ang botelya sa gitagay nga ilimnon.
Ang insidente nahitabo kagahapon sa kadlawon sa sitio Potat, barangay Tinago, dakbayan sa Sugbo. Ang biktima naila nga si Francis Merin Fradez, 28, nagtrabaho sa Prevention, Restoration, Order, Beautification and Enhancement (PROBE) sa Cebu City Hall.
Ang nagdunggab naila lang sa pangalan nga Jomar alyas “Tol”.
Matud ni PO1 Mark Angelo Singson sa Homicide Section sa Cebu City Police Office (CCPO) nga pasado ala-una sa kadlawon gipangita ni Fradez ang iyang asawa nga wala pa nauli sa ilang panimalay ug maoy naabtan nga nagtagay kauban sa mga silingan.
Sumala pa nga gisuwayan pagbadlong sa biktima ang iyang asawa nga mouli na sa ilang balay apan wala naminaw.
Nagdugang og palit og ilimnong makahubog si Jomar nga maoy nakapasamot sa kalagot sa biktima.
Sa iyang kapungot gikuha sa biktima ang botelya ug gipuspos sa lamesa hinungdan sa kasuko ni Jomar.
Nagkalalis ang duha nga misangpot sa pagdunggab ni Jomar sa likod ni Fradez kinsa nakadagan dihang usban unta pagdunggab.
Daling gidala sa Cebu City Medical Center (CCMC) ang biktima samtang dali usab nga misibat palayo sa lugar ang suspek.
Matud ni Singson nga posibleng dunay dili maayong relasyon si Fradez ug iyang asawa hinungdan nga milakaw kini sa ilang balay ug nakig-inom sa iyang silingan.
Sa pagkalandig sa tambalanan sa biktima, giingong wala moduaw ang asawa. - /GMR) (BANAT NEWS)