CEBU, Philippines - Daghang pinakete nga shabu nga gibana-banang mokantidad og P80 mil ug mga drug paraphernalia ang nakuha gikan sa duha ka suspetsado’ng drug pusher atol sa managlahi nga anti-drugs operation sa lungsod sa Aloguinsan ug Tuburan sa miaging adlaw.
Ang mga suspek pulos gidakop pinasikad sa search warrant.
Sa unang operasyon sa kapolisan ilang nasikop si Dante Bayking, 38, taga Purok San Roque, Barangay Santo Rosario, Aloguinsan alas 7:00 sa buntag. Ang balay ni Bayking gironda sa mga polis nga gipangulohan ni Insp. Gilfred Baroman.
Ang kapolisan armado og search warrant nga giisyu ni Regional Trial Court (RTC) Judge Hermes Montero sa Branch 59 sa Toledo City. Nakuha gikan sa balay ni Bayking ang usa ka dako nga bulto ug 46 ka gagmay nga shabu ug mga drug paraphernalia.
Gipanid-an na diay sa kapolisan si Bayking sulod sa usa ka semana sa wala pa rondaha ang iyang gipuy-an. Gihulagway si Bayking sa kapolisan nga “level two” drug pusher nga makabaligya og 50 gramos nga shabu sa semana.
Samtang didto sa Barangay 5, Tuburan si Lyndon Sanchez, 48, nadakpan usab sa mga sakop sa Municipal Anti-Illegal Special Operation Task Group atol sa buy-bust operation alas 10 sa gabii. Usa ka medium ug mga gagmay’ng pakete sa shabu ang nakuha gikan kaniya sa diha’ng giimplimentar sa kapolisan ang laing search warrant nga giluwatan ni Judge Montero.
Gawas sa illegal drugs, mga drug repacking ug drug sniffing paraphernalia usab ang nakuha lakip na ang P650 nga gituohang halin.
Si Sanchez gituohang “level three” drug pusher nga makabaligya og ubos sa 50 gramos nga shabu kada semana.
Base sa impormasyon sa kapolisan si Sanchez sakop sa usa ka banda nga nagbase sa laing nasud ug diha nga miuli kini sa Pilipinas miumol kini og grupo ug nagtudlo tungod kay kompleto man usab kini og kahimanan sa banda. Apan gumikan kay dunay namatikdan ang kapolisan nga dunay laing gihimo si Sanchez, gimando sa hepe sa Tuburan police nga papanid-an ang balay sa suspek aron masayran kun duna kini gihimo’ng daotan.
Nasayran nga giingo’ng gihimo nang suyopanan ang balay sa suspek tungod kay nakuhaan man kini og 17 ka gagmay’ng pakete sa gituohang shabu ug mga drug paraphernalia.
Gikatakda si Sanchez ug Bayking pasakaan og kasong kalapasan sa Republic Act 9165 kon Comprehensive Dangerous Drugs Act ang suspek.. (BANAT NEWS)