CEBU, Philippines - Nagtagbo kagahapon ang kapolisan sa dakbayan sa Sugbo ug mga security providers sa mga malls ug jewelry shops diin gituki ang bag-ong modus sa mga kriminal. Tumong sa maong tigum ang pag-update sa mga security personnel sa lakang nga himoon sa pagsumpo sa mga kriminal.
Gusto sa kapolisan nga ang nahitabo sa kaulohan ug sa Mindanao dili mahitabo sa Sugbo sama sa pagsiaw sa martilyo gang.
Pabantayan usab ang umbrella gang nga magdala og payong sa paglipat sa ilang mabiktima dayong kuha sa mga mahalon nga butang.
Giklaro sa kapolisan nga may limitasyon ang pagdala og armas sa kapolisan sulod sa mall isip tubag sa pangutana sa representante sa SM.
Ang hepe sa Mobile Patrol Group, Supt. Artemio Ricabo, mihatag sa iyang contact number ug miingon nga andam siya nga motabang sa higayun nga manawag kaniya ang mga security supervisors. Laing modus usab nga nakit-an sa kapolisan nga gigamit sa mga kriminal mao ang pagdala og bag nga may anti-static films aron dili mailhan sa metal detector ang sulod niini.
Mapasalamaton si Senior Supt. Arnel Banzon, deputy director for operation sa Cebu City Police Office, sa mga mitambong sa tigum.
Matud pa niya nga kinahanglang magmabinantayon kanunay ang mga security personnel aron malikayan ang mga krimin sulod sa mga malls. Mipasalig si Banzon nga aksyonan dayon sa kapolisan kun magkinahanglan og tabang ang mga malls batok kriminal. (BANAT NEWS)