CEBU, Philippines - Gibutangan na ang Borbon Police Station og bag-ong hepe nunot sa pagrelibo kang Insp. Glen Devocion kinsa anaa na karon sa Cebu Provincial Police Office alang sa imbestigasyon sa pagkasikop sa iyang sakop sulod sa usa ka drug den.
Si Insp. Arvi Arbuis, deputy chief sa Carcar City Police Station ang nihulip kang Devocion niadtong Lunes.
Unahon ni Arbuis ang pag-edukar ug pagpahibalo sa mga estudyante ug mga residente kabahin sa drugas.
Matud ni Arbuis nga naghitak gihapon ang drugas sa Borbon sanglit wala pa masikop ang dagkung pusher sa lugar.
Siya mitug-an nga aduna sila’y tulo ka mga personalidad nga gitutukan karon ug nagpaabot na lang sila sa saktong panahon sa pagsikop niini.
Si PO2 Bernardito Almieda, assistant intelligence officer, nasikop sa Provincial Intelligence Branch sa usa ka buy-bust operation sa barangay Poblacion.
Matud pa nga mao kini ang nagprotektar kang Edwin Cabahug, nga mao ang subject sa operasyon. (BANAT NEWS)