CEBU, Philippines - Hangtod karon nagpabilin nga ngit-ngit ang Cebu South Coastal Road nga habig sa dakbayan sa Talisay.
Si Talisay City Vice Mayor Romeo Villarante, tsirman sa City of Talisay- Traffic Development Authority (CT-TODA), naglaom nga mapasiga na unta ang mga suga sa poste diha sa center island sa Cebu South Coastal Road habig sa Talisay.
Walay suga ang ubang mga poste diha sa CSCR tungod kay ang mga alambre gipangkawat ug delikado kini sa aksidente sa mga motorista nga motadlas sa maong karsada panahon sa gabii.
Si Villarante nagkanayon nga taud-taud na siya nga nagpadangat og hangyo ngadto sa opisina ni Mayor Johnny Delos Reyes ug naglaom nga mahatagan na kini sa pagtagad.
Nunot niini, si Villarante mibutyag nga gitaplan lang una niya ang gasto sa pagpaayo sa mga traffic light diha sa eskena sa Barangay Lawaan ug diha duol sa City Hall mao nga misiga na kini pagbalik sa pagka karon.
Gibutyag ni Villarante nga taud-taud na usab siya’ng nag-request nga mapasiga ang maong mga traffic light nga gipangawatan og alambre.
Pasabot sa bise mayor nga posible’ng dunay mga gamay’ng kakulian maong wala dayon mahatagi og pagtagad sa siyudad ang maong problema.
Si Mayor De los Reyes sa iyang bahin nagkanayon nga ang siyudad nakapamalit na og mga alambre alang sa mga poste diha sa CSCR ug gikatakda na kining ipangtaud aron mosiga na og balik ang mga suga sa center island. (BANAT NEWS)