CEBU, Philippines- Gisikop sa kapolisan ang kaluha nga giingong notadong mga tulisan sa Sugbo human nanulis atubangan sa usa ka pribadong tunghaan sa Kamputhaw, dakbayan sa Sugbo.
Ang nadakpan mao sila Claudio ug Sabelo Fernandez, 30, pulos nagpuyo sa sitio Kawayan, barangay Sambag 2. Si Senior Supt. Noli Romana, direktor sa Cebu City Police Office (CCPO), mitumbok sa kaluha nga mitulis sa usa ka Ma. Estrella Nuñez, 25. Nakuha sa mga suspetsado ang bag nga may sulod cellphone nga kantidad og P6,000, kwarta balor sa P3,000 ug make-up kit. Nadakpan ang mga suspetsado sa pagpatrolya sa kapolisan uban sa tabang sa mga barangay tanod sa Sambag 2 human nailhan sa biktima ang nitulis kaniya.
Nakuha sa kapolisan ang usa ka .38 caliber paltik revolver ug gamit sa pagsuyop sa shabu. - /GMR) (BANAT NEWS)