CEBU, Philippines - Usa ka box sa Marijuana ug klase-klaseng armas ang nasakmit kagahapon sa mga gikan sa usa ka panagatan sa pantalan sa San Roque - Mambaling sa siyudad sa Sugbo kagahapon.
Nasikop usab ang duha ka sakay sa maong pumpboat nga sila si Richard Leyson, 30, taga-Ormoc, Leyte, ug si Jake Perez, 29, taga-Lapu-Lapu City.
Si Loy Anthony Madrigal, team leader sa Anti-illegal Fishing Task Force sa Kapitolyo, nagkanayon nga nakadawat siya’g report nga adunay usa ka pumpboat duol sa Talisay City Fish Port nga giingong nagkarga og mga kontrabando.
Busa nakig-alayon dayon siya sa Naval Forces Central aron masuta ang sulod sa maong sakayan.
Pasado alas-11 kagahapon, giduol sa grupo ni Madrigal ang maong sakayan ug nasuta nga aduna kini kargang mga blasting caps nga giingong gamiton sa ilegal nga pagpangisda.
Apan gawas niana, narekober usab ang usa ka tool box nga inay mga tools ang sud, pinauga diay nga Marijuana, duha ka rifle, .22 kalibreng pistol, ug usa ka wa pa matinong matang sa armas.
Sa pagsuwat niining balita, gidala na ngadto sa Mambaling Police Station ang mga nasakmit ug ang mga suspetsado samtang gidala na ngadto sa Navforcen ang pumpboat.
Sigon ni Madrigal nga mag-atubang ang mga suspetsado og kaso nga illegal possession of firearms, paglapas sa Comprehensive Dangerous Drugs Act ug illegal possession of explosives.
Matud sa miresponde nga team sa Coast Guard Sub-Station Aduana commander nga si Rey Enario nga imbestigahan pa nila kun kinsa ang tag-iya sa maong sakayan.
Samtang gihimakak sa mga suspetsado nga aduna sila’y kalabutan sa mga armas ug drugas sa sakayan. Matud ni Perez nga igo lang sila gisugo nga magtaod sa propeller sa pumpboat. Apan sa dihang gipangutana kini kun kinsa ang tag-iya, wala sila’y gitug-an. (BANAT NEWS)