CEBU, Philippines - Ipahigayun karong Agosto 5 hangtud 7 ang ika-7 nga National Workshop on Civil Registration (7NWCR) sa Waterfront Cebu City Hotel nga pasiugdahan sa Philippine Statistics Authority nga kanhi National Statistics Office. Si Engineer Ariel Florendo, regional director sa PSA-NSO-7, nagkanayon nga ang tema sa maong workshop mao ang “Ikaw at Ako Tungo sa Wastong Pagrerehistro.”
Tumong sa maong workshop ang suklianay sa mga ideya ug pagpaambit sa mga kasinatian sa mga civil registrar, mayor, miyembro sa judiciary ug ubang stakeholders sa mga siyudad ug kalungsoran.
Lakip sa tukion ang kabahin sa kamahinungdanon sa civil registry ngadto sa development partners, role sa civil registration sa panglawas, kasinatian sa implementasyon sa Akta Republika 9048 ug Akta Republika 10172 ug ubang special laws ug value added services nga gitanyag karon sa PSA-NSO.
Nunot niini si Noel Rafols, Public Information Officer (PIO) sa PSA-NSO-7, nagkanayon nga naglaum silang sobra sa 2,000 ka tawo gikan sa nagkalain-laing bahin sa nasud, inilang mga tawo ug opisyal sa national ug international organization ang motambong isip mga resource speakers.
Lakip kanila mao si Secretary Enrique Ona ug Assistant Secretary Eric Tayag sa Department of Health (DOH).
Ang representante sa World Health Organization (WHO) ug sa University of the Philippines ang mopaambit usab sa ilang expertise sa workshop.
Ang national workshop pangulohan ni Dr. Lisa Grace S. Bersales, national statistician ug Civil Registrar General sa PSA uban sa mga opisyal ug kawani sa PSA gikan sa kaulohan.
Ang mga mosalmot sa workshop giawhag sa pagparehistro sa duol nga buhatan sa PSA-NSO provincial ug regional offices sa dili pa ang Agosto 1, 2014. - /GMR) (BANAT NEWS)