CEBU, Philippines - Gidakop sa mga tawo ang usa ka lalaki nga nasakpang misuway unta og kawat sa usa ka itoy nga nagkantidad og P20 mil sa Marville Townhouse, Zodiac Drive, Punta Princesa, dakbayan sa Sugbo kagahapon sa buntag.
Ang dinakpan naila nga si Ariel Herman, 28, nagpuyo sa barangay Quiot.
Matud ni PO2 Erwin Usares sa Punta Princesa Police Station nga unang gisulod ni Herman ang panimalay ni Rene Arranguez, 41, pinaagi sa pagkatkat sa koral ug gikuha ang usa ka itoy.
Ang mga silingan ang unang nakakita sa suspek nga nagdala sa itoy nga giingong gihatag kaniya.
Nagduda ang mga tawo hinungdang daling gipahibawo si Arranguez ug nasuta nga gikawat sa suspek ang itoy.
Usa ka “Wartsila” nga klase nga itoy ang gikawat ni Herman nga sumala pa sa biktima nagkantidad og P20 mil.
Hayan mapun-an pa ang kaso sa dinakpan human duna’y nakuha nga impormasyon ang kapolisan nga posibleng ang dinakpan suspek usab sa mga kawat sa maong lugar.
Dugang pa ni Usares nga ila pang gipaabot ang uban nga posibleng moreklamo batok ni Herman nga karon gitanggong na sa detention cell sa Punta Princesa Police Station. (/GMR)(BANAT NEWS)