CEBU, Philippines - Padayong gisubay sa kapolisan sa dakbayan sa Mandaue ang pag-ila sa milungkab sa Gascon Apartment sa barangay Ibabao nga misakiyo sa mga alahas, salapi ug mahalong mga butang sa mga nagpuyo nga mga babaye.
Si PO3 Victor Isidro miila sa mga biktima nga sila si Rassine Calsada, 28 ug Jennifer Pasa, 26, nga nagpuyo sa maong dapit nga gikawatan sa ilang iPhone, Samsung GT-E 1200T, kuwentas nga bulawan, bracelet ug salaping cash.
Matud ni Isidro nga ang laing nagpuyo sa maong apartment nga si Janice Ordoñez maoy unang nakadiskubre nga naabli na ang lawak sa duha ka biktima.
Dugang ni Isidro nga sa ilang pakisusi nga gihimo ilang nasuta nga ang mga kawatan nakahigayon pagsulod sa lawak nga gipuy-an sa mga biktima pinaagi sa paggamit og master key nga maoy nakaingon sa pagkaabli sa pultahan.
Ang Scene of the Crime Operatives (SOCO) maoy naghimo og dugang pakisusi pinaagi sa pagpanguha og mga finger prints palibot sa lawak nga naglakip na sa pultahan. (BANAT NEWS)