CEBU, Philippines- Kapin sa 100 ka bata diha sa Sitio Mananga, Barangay Tabunok, dakbayan sa Talisay ang gipakaon og lugaw sa kapolisan sa siyudad kagahapon sa buntag. Gawas niini, 80 ka mga bata diha sa lugar ang gipanghatan og tsinelas sa mga polis.
Ang Police Community Relation (PCR) sa Talisay City Police Station nga si PO2 Rechel Abellanosa nga nahinabi sa Banat News kagahapon mibutyag nga ang mao nilang lakang lakip kini sa programa sa kapolisan sa pagpaduol nila ngadto sa komunidad.
Matud ni Abellanosa nga gawas sa feeding program ug pagpanghatag og mga tsinelas mipahigayon usab sila og information drive kabahin sa ginadiling drugas ug cyber crime. Ang mga bata gitudloan usab sa kapolisan kabahin sa ilang katungod.
Gawas sa mga bata ang mga inahan o kababayen-an diha sa mga lugar nga bisitahon sa kapolisan ilaha usab nga gi-edukar kabahin sa ilang katungod ug kung unsay ilang buhaton kung sila abusohon. - / EIM) (BANAT NEWS)