CEBU, Philippines - Gitulis dayon gipusil patay ang usa ka taxi drayber sa wala pa mailhi nga mga tulisan didto sa awaaw nga lugar sa Barangay Tilhaong, Consolacion niadtong Biyernes sa gabii.
Ang patay’ng lawas ni Felimon Borden, taga Barangay Apas, Cebu City nadiskubre anang alas 8:00 sa buntag sulod sa iyang gimaneho nga VBL taxi nga adunay plaka nga GWR 577.
Adunay samad pinusilan si Borden sa iyang ulo nga maoy hinungdan sa iyang hinanaling kamatayon. Nakuha sa crime scene ang tulo ka mga bala sa .45 nga kalibre.
Matud ni PO3 Reche Gilliran, investigator on case, gisubay nila karon ang mga witness sa dapit diin gipara si Borden ngadto na sa pag-abot niini sa Barangay Tilhaong.
Tulis ang gidudahang motibo sa kapulisan sa maong krimen bisan pa man nga adunay P1,200 cash sa iyang bulsa.
“Nawala na iyang cellphone kay magdala man gyud kuno na siya unya kadtong cash nga nakit-an diha to sa iyang bulsa posible sa pagsukol sa biktima wala na madala,” matud ni Gilliran.
Ang kapulisan nagtuo nga gipatay ang biktima mga alas 8:00 sa gabii. Nahibulong na lang ang operator sa taksi nga wala na motubag sa cellphone ang biktima kay unta mogarahe man kini pagkagabii.
Mga hapit na alas 9:00 sa gabii sa dihang naagian og habal-habal drayber ang taxi apan anang alas 5:50 na sa buntag kagahapon kini nabantayan nila ni Arturo Awitan ug Arnel Mayol nga adunay patay.
Matud ni Gilliran duha ngadto sa tulo ka mga tawo ang responsable sa maong pagpatay.
Tungod usab sa kaawaaw sa lugar walay nakadungog og buto sa armas. (BANAT NEWS)