CEBU, Philippines - Patay ang usa ka langyaw human kini gidunggab sa iyang uyab nga Filipina gamit ang usa ka gunting diha sa sulod sa usa ka hotel nga nahimutang sa dalan Pelaez eskina sa Colon Street, Barangay Kalubihan, Cebu City kagahapon sa kaadlawon.
Ang biktima naila nga si Jens Overgaard Bjerre, 65, lumad nga taga Kobenhavn, Denmark ug kasamtangan nga nagpuyo sa usa ka hotel, samtang ang suspetsado nga iya ra ‘sab nga hinigugma naila nga si Cheryl Samante Maranga, 26, taga Barangay Banlot, Sibonga. Sa imbestigasyon sa Carbon Police Station gitug-an ni PO2 Mario Nator nga nagselos ang langyaw sa iyang uyab gumikan sa pagtoo nga naa kini lain nga karelasyon, hinungdan nga nahitabo ang lalis sa duha.
Usa sa mga staff sa hotel nga si Romeo Catubig ang unang nakadungog sa komosyon sulod sa lawak sa duruha ug misunod ang singgit nga nangayo na og pakitabang si Maranga.
Pag-abot sa guwardiya nakita nila ang langyaw nga naglingkod sa salog nga nagsapupo sa iyang dughan nga nagkadugo. Dali nila kining gidala sa Chong Hua Hospital, apan nakabsan kini sa iyang kinabuhi. Duna kini samad sa dughan ug sa tuo nga bahin sa iyang kamot.
Sumala pa ni PO2 Nator, mitug-an ang babaye nga pasakitan unta siya sa langyaw apan misukol siya ug iya kining nadunggaban.
Narekober sa kapulisan ang siyam ka pulgadas nga gunting, mga gamit sa langyaw naglakip sa cellphone, camera, laptop, P3 mil cash ug uban pa nga gadgets ug duna say nakuha nga shabu paraphernalia sa lawak. (BANAT NEWS)