CEBU, Philippines - Suportado sa hepe sa Police Regional Office-7 ang pagpasaka og kasong kriminal ug administratiba batok sa usa ka polis nga naapil pagkasikop atol sa buy-bust operation sa Provincial Intelligence Branch sa lungsod sa Borbon.
Matud pa ni PRO-7 direktor, Chief Supt. Prudencio Tom Bañas, nga nakig-alayon na sila sa Cebu Provincial Police Office (CPPO) alang sa himuong summary dismissal proceedings batok ni PO2 Bernard Almeda.
Gihulagway ni Bañas nga dakung binuang ang pasangil ni Almeda nga igo lang siyang gisugo sa iyang hepe sa Borbon nga mohimo og surveillance sa kalihukan sa drugas sa maong lugar.
Apil sa patubagon ang hepe sa kapolisan sa maong lungsod, Insp. Glen Devocion, kung nganong gisugo ang iyang sakop nga mag-surveillance sa maong lugar nga dugay na’ng gidili nga paagi.
Gipasabot ni Bañas ga dili gyud siya mo-tolerate sa maong matang nga polis ug angay lang silutan ug matangtang sa serbisyo.
Subli giklaro ni Bañas nga prayoridad niya isip labaw sa PRO-7 ang paglimpiyo sa problema sa drugas ug pagsilot sa mga polis nga apil sa maong ilegal nga kalihukan. (BANAT NEWS)