CEBU, Philippines - Patay ang usa ka lalaki human gisaka sa balay ug gidunggab sa iyang silingan sa Buyo, Poblacion South, dakbayan sa Naga kagahapon sa buntag.
Ang biktima naila nga si Rolando Otero, 21, samtang ang suspek silingan ra sa biktima nga si Federico del Monte, 20.
Sa imbestigasyon sa kapolisan pinaagi ni PO2 Jonathan Largo nasayran nga samtang naglingkod sulod sa iyang balay ang biktima kalit lang gisaka sa suspek dayon dunggab sa likod nga bahin sa iyang liog.
Ang suspek daling midagan apan sumala pa nga nakahimo pa og paggukod si Otero apan pag-abot sa pipila ka metros natumba kini.
Ang mga silingan nga nakakita sa maong panghitabo ang dali untang midala sa biktima sa South General Hospital apan gideklarar nga patay na.
Daku ang pagtuo sa kapolisan nga dunay dakung bikil ang duruha.
Gipangita pa sa kapolisan ang suspetsado kinsa pasakaan og kasong murder. - GMR) (BANAT NEWS)