CEBU, Philippines- Giawhag ni Cebu City Mayor Mike Rama ang mga opisyal sa Pagkakaisa ng mga Samahan ng Tsuper at Opereytor Nationwide (PISTON) nga dili lang tanang miyembre niini ang patambungon sa himuong public hearing sa city hall karung Miyerkules.
Ang pangulo sa PISTON Cebu nga si Greg Perez mibutyag nga andam silang motambong sa public hearing. Buot ni Perez nga patambungon ang 500 niya ka mga sakop apan dili mosugot niini si Rama. Ang public hearing mutuki mahitungod sa reklamo sa mga drivers sa dako nga multa kung makalapas sa balaod sa trapiko. Atol sa hearing, imbitado usab ang representante sa LTFRB-7 ug LTO-7 aron mahatagan og higayon ang mata’g habig nga mosulti sa ilang mga sentimiyento.
Matud sa PISTON nga dako ra kaayo ang multa ug di kini makiangayon alang kanilang mga ordinaryong mamumuo lamang.
Sumala pa ni Rama nga kung dayonon sa PISTON ang ilang strike andam ang kagamhanan sa siyudad sa Sugbo sa pagpagamit sa mga buses niini ingon man sa mga barangay.
Kung si Rama ang pasultion, aduna’y basehan ang gihimo sa gobiyerno sa pagpataas sa multa apan kadto lamang sa mga angayan silotan. Gikonsiderar ni Rama nga usa ka economic sabotage ang bisan unsang lakang sa grupo nga makahatag og disturbo sa ekonomiya sama kung mahunong na ang dagan sa negosyo tungod sa ilang mga buhaton.
Nagtoo ang mayor nga naa say mga abogado ang maong grupo busa kinahanglan moagi sa legal nga proseso ang tanan. - /EIM) (BANAT NEWS)