CEBU, Philippines - Gihangop sa mga tricycle driver ug operator ang hugot nga pagpatuman sa Joint Administrative Order 2014-01 sanglit lakip man sa makabayad og dagko’ng multa ang mga tag-iya og traysikol nga kolorum nga namasahero nga walay prangkisa.
Si Joebert “Bong” Nemenzo nga maoy tsirman sa National Confederation of Tricycle Operator’s and Driver’s Association (NCTCDA) miingon nga kun tinud-on sa Land Transportation (LTO) 7 ang pagpatuman sa balaod daghang kolorum nga traysikol ang ilang masakpan.
Matud ni Nemenzo nga sa dakbayan sa Mandaue ug ingon man sa lungsod sa Consolacion aduna la’y 30 porsiyento sa mga nagdagan nga traysikol ang legal sa ilang pagpamasahero, ang kadaghanan mga kolorum.
Si Nemenzo miingon nga daghang traysikol nga namasahero sa dakbayan sa Mandaue, lungsod sa Consolacion ug Cordova walay prangkisa gikan sa Local Government Units (LGU) diin kini mag-operate.
Giangkon ni Nemenzo nga lisod ang pagdakop sa kolorum nga mga traysikol kay sa panahon nga hingusgan ang pagpanakop labing siguro nga dili usab kini padaganon sa ilang mga tag-iya.
Daghan ang nagtuo nga ang kagamhanan dili gayud mohingusog pagpanakop sa kolorum nga mga traysikol kay sila walay kalainan sa “habalhabal” nga nahimo na nga panginabuhian ug nagserbisyo usab kini sa katawhan nga walay kasakyan paingon sa hilit nga mga lugar.
Gusto unta ni Nemenzo nga ang LTO mao gayud unta ang manakop sa mga kolorum nga traysikol kay kun ang mga kawani sa lokal nga kagamhanan maoy saligan dili gayud sila mohingusog pagpanakop kay mahadlok nga maglagot ang katawhan sa ilang mga opisyal.
Gibutyag ni Nemenzo nga ang mga tag-iya og kolorum nga traysikol mipabiyahe sa mga hilit nga lugar sa kabarangayan kay gisundog man nila ang mga habal-habal nga gipasagdan lang sa kagamhanan sa ilang pagpamasahero. (BANAT NEWS)