CEBU, Philippines - Tindero’g sigarilyo midunggab sa tawo nga iyang gikakontra apan nagunitan ang iyang kamot ug giunay hinuon siya’g dunggab gamit ang kaugalingon niya nga kutsilyo.
Didto kini mahitabo sa Sitio Sta. Cruz sakop sa Barangay Pusok, dakbayan sa Lapu-Lapu kaniadto’ng Biyernes sa gabii, sumala pa ni PO1 Benjie Pantoja sa presinto 5 sa Lapu-Lapu City Police Office.
Base sa pasiuna nga imbestigasyon nasayran nga si Ernesto Lambojon, 30, maoy una nga midunggab ni Martin Salodar, 50, apan nailog ni Salodar ang kutsilyo ni Lambojon.
Matud ni PO1 Pantoja nga si Lambojon ug Salodar adunay karaang panagbikil ug nagsinukmatay kini dihang nagkakita nga miresulta sa mainiton nga panaglalis.
Wala makapugong sa iyang kasuko, si Lambojon miibot og kutsilyo nga giluklok niini sa hawak ug gihansak ngadto ni Salodar. Nakaangkon si Salodar ug samad sa bukton ug ubang parte sa kalawasan apan nakamaneho pa paglubag sa bukton ni Lambojon.
Dihang nailog na ni Salodar ang kutsilyo, si Lambojon nagdali nga mitalikod aron unta modagan apan gidunggab kini ni Salodar sa bukobuko. Ang samaran nga si Lambojon gidala sa Vicente Sotto Memorial Medical Center. (BANAT NEWS)