CEBU, Philippines - Gimonitor sa Department of Trade and Industry-7 ang presyo sa ubang nag-unang palaliton sama sa gatas.
Kini nunot sa pagsaka sa presyo sa mga produktong petrolyo ug agrikulturanhon sa bugas ug ahos.
Si Rose Mae Quiñanola sa DTI-7 Consumer Welfare and Business Regulatory Division nitug-an nga base sa ilang labing ulahing monitoring, ang presyo sa processed milk products sama sa evaporated, condensed ug powdered milk nisaka og singko ngadto sa otso porsiyento gikan sa suggested retail price (SRP).
Nisaka usab ang presyo sa semento tungod sa 19 porsiyento nga pagsaka sa bayranan sa kuryente ug singko porsiyento sa lana.
Matud ni Quiñanola nga kanunay nilang gi-monitor ang presyo sa nag-unang palaliton sama sa processed meat, bottled water, sardines, coffee, detergent, laundry soaps, instant noodles, salt, vinegar, bread, soy sauce, toilet soap, batteries, cement ug steel bars.
Kini aron pagseguro nga gituman gyud sa mga negosyante ang SRP sa maong mga commodities.
Giklaro niini nga stable ang supply ug presyo sa basic commodities sa Sugbo sanglit ang mga petitions sa mga manufacturer alang sa pagsaka sa presyo gipaubos sa istriktong validation and evaluation sa dili pa kini tugtang makapatuman sa taas nga presyo sa mga produkto.
Gani wala aprobahi sa ilang buhatan ang petisyon sa mga manufacturers sa canned meat ug bottled water alang sa price adjustment sa ilang produkto tungod sa kakulang sa basehanan ug justification sa gipetisyon niining price increase.Samtang gitambagan ni Quiñanola ang mga konsumedor nga lilion gyud niini ang "weight and price tag" sa mga produkto sa dili pa paliton. (BANAT NEWS)