CEBU, Philippines - Gipasaylo na sa 17-anyos nga inahan kadto’ng pari nga mipakauwaw kaniya pinaagi sa grabe’ng pagkasaba atol nga nagpabunyag ang dalagita sa iyang anak sa simbahan didto sa Barangay Jagobiao, Mandaue kaniadtong Domingo.
Si Rev. Fr. Romeo Obach personal nga nangayo og pasaylo sa inahan sa dalagita atol sa ilang panagkita didto sa Redemptorist Church sa dakbayan sa Sugbo kaniadto’ng Lunes sa hapon ug nagpadala pa gayud og duha ka suwat nga gihimo sa eninglis ug binisaya.
Giingon nga si Father Obach nagbasol g’yud sa iyang gihimo ug giingong naghilak pa kini samtang nangayo og pasaylo sa inahan sa dalagita ug nasayran nga dul-an sa singko minutos nga naggaksanay ang duha human nagkapasayloay.
Gusto g’yud hinuon sa dalagita nga makigkita kaniya ang pari ug personal nga mangayo’g pasaylo sa iyang nahimo nga nakapauwaw kaayo kaniya. Sa suwat sa pari nga gipadala sa dalagita siya nagkanayon.
“Tuguti ako sa pagpadayag sa akong dako’ng pagbasol sa akong sakit nga nabuhat, una sa tanan kanimo ug sa tanan nga mga saksi. Wala g’yud nako damha nga makapamulong ako niadto atubangan ninyo’ng tanan.
“Gihinulsolan nako kini og nagpakilooy ako nga imo akong pasayloon sa gibuhat ko niadtong Hulyo 6, 2014 sa chapel sa Sacred Heart. Manghinaot ako nga maalim og dali ang samad sa atong dughan tungod niining wala gipalandong nga hitabo. Sa makausa pa, pasayloa intawon ako.
“Andam usab ako makigkita kanimo sa imong gusto’ng panahon ug lugar aron personal ako nga makapadayag sa pagpangayo’g pasaylo, matud sa pari.
Ang 17-anyos nga inahan miingon nga daghan kaayo ang buot motabang kaniya pinaagi sa paghimo og lakang nga matabangan siya sa Commission on Human Rights (CHR), Department of Social Welfare and Development (DSWD) ug uban pa nga ahensya sa kagamhanan.
Mapasalamaton kaayo ang batan-on nga inahan sa simpatiya sa katawhan apan nahukman na niya ug sa iyang inahan nga pasayloon lang ang pari sa iyang nahimo.
Ang 37-anyos nga inahan sa dalagita nagkanayon nga nakahatag gayud og dako’ng kahasol sa ilang pamilya ang pagkasaba ni Padre Obach ngadto sa iyang anak atubangan sa iyang mga classmates nga mitambong sa bunyag. Si Jagobiao Barangay Konsehal Michael Masinas nga usa sa mga nagkugos sa gibunyagan nga bata miapil sa mga misaway sa gihimo sa pari apan matud niya nga ang pagpangayo niini og pasaylo sa pamilya ug ngadto sa publiko nagpasabot lang nga nakaamgo na kini sa iyang sayop busa angay ang pari pasayloon. Apan bisan pa og nagkapinasayloay na ang 17-anyos nga inahan ug si Father Obach, ang Commission on Human Rights (CHR) motabang gihapon sa pamilya sa dalagita aron gukdon ang nakapaanak kaniya ug mibiya.
Sila si Primo Cadampog ug Lilybeth Llona maoy nakig-estorya sa 17-anyos ug sa iyang inahan ug gipangutana kun mopasaka ba sila og kaso batok sa pari. Si Cadampog mibutyag nga kun unsay desisyon sa pamilya andam silang motabang ug mosuporta sa unsay ilang tinguha.
Gidugang ni Llona nga mapugos g’yud ang amahan sa bata nga mohatag og sustento tungod kay posible man siya’ng pasakaan og kaso sama sa kalapasan sa Republic Act 7610, kon Child Abuse ug Violence Against Women and Children.
Matud sa inahan sa dalagita nga tutokan nila karon ang pagpangita sa amahan sa iyang apo aron kahatagan og hustisya ang iyang anak nga hapit naghikog human kini kalit nga gibiyaan. Ang kagamhanan sa Mandaue nangita na usab sila og ahensya aron matabangan ang dalagita nga makapadayon pagtungha ilabi na nga hapit na kini motapos sa koliheyo. - /RUB (BANAT NEWS)