CEBU, Philippines - Nasikop atol sa buy bust operation sa City Intelligence Branch ang duha ka tinun-an kinsa nakuhaan og 56 ka Nubain nga paingon untang ibaligya sa may City Center, Kamagayan, dakbayan sa Sugbo niadtong Lunes sa gabii.
Ang duha pulos menor de edad nga nagtungha sa night high school ug elementary school sa Zapatera sa maong dakbayan.
Matud ni Supt. Romeo Santander, hepe sa CIB, nga dugay na silang nakakuha sa impormasyon nga dunay mga menor de edad ang gigamit sa mga drug pusher sa pagpayuhot sa drugas.
Usa ka alyas James ang giingong nagsugo sa duha ka tinun-an sa pagbaligya bugti sa P5 hangtud P10 matag Nubain nga mabaligya.
Gisubay sa kapolisan kung taga asa si James ug unsa ka daku ang negosyo niini sa maong klase sa drugas.
Gipanid-an usab sa CIB ang pharmacy nga giingong sayon lang kaayo nga mobaligya sa Nubain bisan wala’y resita sa doktor.
Nunot sa pagkasikop sa duha ka tinun-an, gitun-an karon sa kapolisan kung apilon ba sa pagpasaka og kaso ang mga ginikanan.
Matud ni Santander nga duna’y street value nga P12 mil kapin ang mga Nubain nga nakuha sa kapolisan.
Gi-turnover na ngadto sa Department of Social Welfare and Development ang duha ka mga menor de edad samtang dugang imbestigasyon ang gipahigayon. – /GMR (BANAT NEWS)