CEBU, Philippines - Ang konseho sa dakbayan sa Talisay mipalabang og resolusyon nga nag-awhag kang Mayor Johnny De los Reyes pagpalit og tow truck nga magamit sa ilang mga traffic enforcers sa pagguroy sa mga sakyanan nga gipataka og parada ug lakip sa mga sakyanan nga mapalyar taliwala sa karsada aron dili kini makamugna og problema sa trapiko.
Si Konsehal Danny Caballero misugyot nga mopalit ang dakbayan sa Talisay og tow truck kay matud pa ang kantidad niini gisukip na sa Annual Investment Program (AIP) karong tuiga ug naaprobahan kini sa City Development Council (CDC) kaniadtong Disyembre 6, 2013.
Atol sa gipahigayon nga tigum sa City of Talisay Peace and Order Council niadtong Hunyo 24, ang hepe sa City of Talisay-Traffic Operation Development Authority (CT-TODA) nga si Mario Zafra mipadayag nga nagkinahanglan sila og tow truck nga moguroy sa mga sakyanan nga napalyar taliwala sa karsada ug sa mga sakyanan nga gipataka lang og parada sa mga tag-iya.
Ang Traffic Code sa Talisay naglatid nga ang mga sakyanan nga giparada sa dili tukma nga lugar o designated area i-clamp o i-towing ug dad-on ngadto sa luwas nga impounding area sa CT-TODA ug i-release lang kun ang tag-iya makabayad na sa multa.
Si Caballero nag-kanayon nga ang pagbaton og tow truck makatabang kini nga maluag ang trapiko tungod kay magmatngon na man unya ang mga motorista nga dili magpataka og parada sa ilang mga sakyanan.
Gawas niini ang siyudad makakolekta og dugang kita tungod kay kadtong maguroy nga sakyanan mobayad man g’yud ang mga tag-iya sa ilang multa aron ma-release ang sakyanan. (BANAT NEWS)